Dronët ukrainas po fluturojnë thellë në Rusi për të goditur objektet e naftës , duke dërguar lart re tymi që mund të shihen nga hapësira dhe duke sjellë shi toksik në destinacionet turistike në Detin e Zi.

Sulmet synojnë të ulin eksportet e naftës së Moskës, një burim kyç financimi për pushtimin e saj të ashpër të Ukrainës. Por ndikimi ekonomik është deri më tani i paqartë, pasi rritja e çmimeve të naftës nga lufta me Iranin dhe një lehtësim i lidhur me të i sanksioneve amerikane , kanë ndihmuar në rimbushjen e arkës së Kremlinit, shkruan AP, transmeton KosovaPress.

Megjithatë, diapazoni i sulmeve dhe ndikimi i tyre mjedisor po e bën luftën të qartë për rusët e zakonshëm, larg vijave të frontit.

Derdhja e naftës në rrugë

Dronët ukrainas kanë goditur rafinerinë e naftës dhe terminalin e eksportit në qytetin Tuapse të Detit të Zi në katër raste brenda pak më shumë se dy javësh , duke shkaktuar zjarre që çuan në evakuime lokale dhe ngritën re të mëdha tymi. Qyteti është afërsisht 450 kilometra (280 milje) nga vijat e frontit.

Në një video të postuar nga guvernatori lokal Veniamin Kondratyev pas sulmit të tretë më 18 prill, një zyrtar i emergjencave tha se produktet e vajit të vluar ishin derdhur në rrugë, duke dëmtuar makinat.

Ukraina tha të enjten se goditi një stacion pompimi nafte në rajonin Perm të Rusisë, më shumë se 1,500 kilometra (900 milje) larg Ukrainës, për dy ditë rresht. Mediat ruse raportuan sulmet, megjithëse guvernatori i Permit, Dmitry Makhonin, tha vetëm se dronët kishin goditur objekte industriale.