Ministri Ukrainas i Mbrojtjes, Rustem Umerov ka bërë të ditur se administrata e presidentit Joe Biden është ende duke shqyrtuar kërkesën e tij për të hequr kufizimet në përdorimin e armëve me rreze të gjatë veprimi për sulme thellë brenda territorit rus, dhe konfirmoi se në takime me zyrtarë të lartë në Uashington prezantoi një "listë të objektivave ukrainase në Rusi”.

“Ne shpjeguam se çfarë aftësish kemi nevojë për të mbrojtur qytetarët nga terrori rus”, tha Umerov në një intervistë për CNN.

Pavarësisht kërkesave të vazhdueshme nga presidenti ukrainas Volodymyr Zelensky, SHBA-ja aktualisht nuk pritet të lehtësojë kufizimet në përdorimin e Ukrainës të ATACMS (Sistemet e Raketave Taktike të Ushtrisë) me rreze të gjatë.

"Ne kemi thënë se ukrainasit mund të përdorin ndihmën amerikane të sigurisë për t'u mbrojtur kundër sulmeve ndërkufitare. Por për sa i përket sulmeve me rreze të gjatë thellë brenda Rusisë, politika jonë nuk ka ndryshuar," tha zëdhënësi i Pentagonit, gjeneralmajor Pat Ryder.

Ukraina ka një rezervë të kufizuar të raketave me rreze të gjatë veprimi të furnizuar nga SHBA, dhe kjo e fundit e ka bërë të qartë se Kievi nuk duhet të presë një dërgesë tjetër të rëndësishme të ATACMS për shkak të numrit të kufizuar në rezervat e SHBA dhe kohës së gjatë të prodhimit të armës, tha një zyrtar amerikan.

Duke folur përpara një takimi midis sekretarit të Mbrojtjes të SHBA Lloyd Austin dhe Umerov, zyrtari tha se shumë nga objektivat ukrainas në Rusi ishin përtej rrezes së ATACMS. Ushtria ruse ka tërhequr asetet e saj më të vlefshme ushtarake larg vijave të frontit, duke përfshirë avionët që hedhin bombat rrëshqitëse që kanë bërë kërdi në të gjithë Ukrainën.

Por Umerov kundërshtoi vlerësime të tilla, duke thënë se Ukraina i kishte paraqitur SHBA-së një listë të objektivave që do të përdorte për sulmet ATACMS.

"Ne kemi vërtetuar se fushat ajrore të përdorura nga rusët për të sulmuar qytetet tona janë brenda rrezes së ATACMS," tha Umerov.

Ukraina deri më tani ka përdorur ATACMS për të synuar objektivat në Krimenë e pushtuar, duke përfshirë depot e municioneve dhe fushat ajrore.

"Rusët po vrasin qytetarët tanë. Kjo është arsyeja pse ne duam t'i pengojmë ata, ne duam t'i ndalojmë ata, ne nuk duam të lejojmë që aviacioni i tyre të afrohet me kufijtë tanë," tha Umerov.

Umerov foli edhe për objektivat e ofensivës në Kursk. "Ne jemi të fokusuar në rritjen e aftësive tona për të dëbuar rusët nga territoret e pushtuara përkohësisht," tha ai, duke shtuar se qëllimi i Ukrainës nuk është të mbajë territor në Rusi.

Komandanti i lartë i Ukrainës, Oleksandr Sirski, tha të premten se forcat ukrainase kishin avancuar deri në dy kilometra në Kursk gjatë 24 orëve të fundit.

Ndërkohë, forcat ruse po përparojnë ngadalë në Ukrainën lindore, duke u mbyllur në Pokrovsk, një qytet strategjik në një rrugë kryesore të furnizimit. Një zyrtar amerikan tha se Rusia po numëron një mijë viktima në ditë ndërsa përparon në Ukrainën lindore.