Presidenti i SHBA-së, Donald Trump, ka thënë se Irani po “i afrohet shumë” arritjes së një marrëveshjeje me SHBA-në për luftën, pasi Teherani gjithashtu sinjalizoi se ishte bërë përparim javën e kaluar.

Megjithatë, të dyja palët kanë qenë të kujdesshme dhe zëdhënësi i ministrisë së jashtme të Iranit tha se çështja kryesore e armëve bërthamore nuk do të ishte pjesë e asnjë propozimi fillestar.

Trump i tha partnerit amerikan të BBC-së, CBS News, se kishte parë një draft-marrëveshjeje me Iranin. Kur u pyet nëse ishte mjaftueshëm e mirë, ai tha: "Nuk e di, nuk mund t'ju them këtë., shkruan BBC, transmeton KosovaPress.

Presidenti nuk dha detaje të mëtejshme mbi draftin, por këmbënguli se çdo marrëveshje do ta pengonte "absolutisht" Iranin të pajiset me armë bërthamore.

"Do të nënshkruaj vetëm një marrëveshje ku marrim gjithçka që duam", tha ai. "Do të kemi një marrëveshje, ose do të kemi një situatë ku asnjë vend nuk do të goditet aq fort sa është gati të goditet."

Zëdhënësi i ministrisë së jashtme iraniane, Esmaeil Baqaei, i tha televizionit shtetëror të shtunën se qëndrimet e SHBA-së dhe Iranit ishin afruar gjatë javës së fundit, por paralajmëroi se kjo nuk do të thotë se do të arriheshin marrëveshje për çështjet kryesore dhe akuzoi amerikanët për "deklarata kontradiktore".

“Plani ynë ka qenë që së pari të hartojmë një memorandum mirëkuptimi, ose një marrëveshje, në formën e një kornize, që përbëhet nga 14 pika”, tha ai, sipas agjencisë së lajmeve Reuters.

Baqaei tha se ata ishin në proces të finalizimit të memorandumit, kështu që bisedime të mëtejshme mund të zhvillohen brenda 30 deri në 60 ditësh "dhe në fund të fundit mund të arrihet një marrëveshje përfundimtare".