Presidenti amerikan, Donald Trump ka thënë se po e shqyrton seriozisht tërheqjen e Shteteve të Bashkuara nga NATO, pasi aleanca nuk iu bashkua luftës së tij ndaj Iranit, sipas The Telegraph, transmeton KosovaPress.

Ai e quajti NATO-n “tiger prej letre” dhe tha se largimi i SHBA-së nga traktati i mbrojtjes është “përtej rishqyrtimit”, duke shtuar se nuk është ndikuar kurrë nga aleanca dhe se edhe presidenti rus Vladimir Putin e sheh atë si të dobët.

Trump kritikoi gjithashtu aleatët evropianë për mosmbështetje në përpjekjet për rihapjen e Ngushticës së Hormuzit, e cila është mbyllur nga Irani për javë të tëra, duke shkaktuar rritje të çmimeve globale të naftës dhe gazit.

Duke iu referuar Britanisë së Madhe dhe kryeministrit Keir Starmer, ai tha se Britania “nuk ka marinë të aftë”, duke përmendur gjendjen e flotës dhe aeroplanmbajtëseve, si dhe kritikoi fokusin e Londrës në energjinë e rinovueshme, duke i quajtur “mullinj me erë të kushtueshëm”.

Sekretari amerikan i shtetit Marco Rubio gjithashtu tha për Fox News se NATO është bërë një “rrugë njëkahëshe” dhe se pas përfundimit të konfliktit në Iran, SHBA do të duhet të “rishikojë” anëtarësimin e saj në aleancë, veçanërisht për shkak të mungesës së qasjes në baza ushtarake nga disa aleatë.

Trump pritet të mbajë një fjalim drejtuar kombit për luftën në orët në vijim, ndërsa konflikti me Iranin, sipas tij, mund të përfundojë brenda “dy deri në tre javë”, me synimin kryesor ndalimin e programit bërthamor iranian.

Raportohet gjithashtu se administrata e tij po shqyrton një model “paguaj për pjesëmarrje” në NATO dhe madje tërheqjen e trupave amerikane nga Gjermania. NATO ka aktivizuar nenin 5 vetëm një herë në histori, klauzola e mbrojtjes së ndërsjellë “sulmi ndaj njërit është sulm ndaj të gjithëve”,

Kërkesa e Trump që NATO të ndihmojë në luftën e tij me Iranin ka ngritur pyetje rreth Nenit 5, klauzolës së mbrojtjes së ndërsjellë “sulmi ndaj njërit është sulm ndaj të gjithëve”.