Ish-presidenti amerikan, Donald Trump prezantoi të shtunën një linjë atletesh, një ditë pasi ai dhe kompanitë e tij u urdhëruan nga një gjykatës të paguanin afro 355 milionë dollarë për mashtrim civil në Nju Jork.

Trump prezantoi "Trump Sneakers" në Sneaker Con në Filadelfia. Atletet ngjyrë floriri, të cilat kanë çmimin 399 dollarë, Trump i quajti "NEVER SURRENDER HIGH-TOP SNEAKER" në podium ndërsa fliste.

“Kjo është diçka për të cilën kam folur për 12 vjet, 13 vjet, dhe mendoj se do të jetë një sukses i madh,” tha Trump, i cili po marshon më pranë nominimit republikan të vitit 2024 dhe një revansh të mundshëm me Presidentin Joe Biden.

Deri në mbrëmjen e së shtunës, atletet prej 399 dollarësh u renditën si të shitura në faqen e internetit. Sipas uebsajtit, kishte pasur 1000 palë atlete në dispozicion për blerje.

Ish-presidenti po shet gjithashtu dy versione të atleteve me mbishkrime "T" dhe "45" anash për 199 dollarë, sipas faqes së internetit. Kolonja dhe parfumi shiten me 99 dollarë secili.

Sipas faqes së internetit, produktet janë “marka tregtare të CIC Ventures LLC. Atletet Trump nuk janë dizajnuar, prodhuar, shpërndarë ose shitur nga Donald J. Trump, Organizata Trump apo ndonjë prej filialeve ose drejtuesve të tyre përkatës. 45 Footwear, LLC përdor emrin dhe imazhin e Trump sipas një marrëveshjeje licence.”

Zëdhënësi i fushatës së Bidenit, Michael Tyler, kritikoi ashpër paraqitjen e Trump në Sneaker Con.

Pas paraqitjes së tij në Sneaker Con, Trump pritet të shkojë në Michigan për t'iu drejtuar mbështetësve për herë të parë që kur vendimet në çështje të veçanta të Nju Jorkut vunë në qendër të vëmendjes rrezikun ligjor me të cilin përballet në shumë fronte.

Vizita e Trump në Michigan është caktuar për 10 ditë përpara se shteti të mbajë zgjedhjet e tij republikane. /CNN/