Presidenti i sapo zgjedhur i SHBA-së, Donald Trump, ka zgjedhur Kevin Marino Cabrera ambasador në Panama, pasi ai kërcënoi se do të rivendoste kontrollin  mbi Kanalin e Panamasë.

Trump shkroi në platformën Truth Social se pak njerëz e kuptojnë politikën e Amerikës Latine sikurse Kevin Cabrera.

“Ai do të bëjë një punë fantastike duke përfaqësuar interesat e vendit tonë në Panama”, shkroi ai.

Të dielën, Trump kërcënoi se do të rivendoste kontrollin amerikan mbi Kanalin e Panamasë, pasi tha se vendi i Amerikës Qendrore, me të cilin SHBA ka marrëdhënie diplomatike qe nga viti 1903, "po vjedh nga Amerika në Kanalin e Panamasë në një shkallë të paimagjinueshme".

Trump akuzoi ushtarët kinezë se operojnë kanalin ilegalisht dhe "gjithmonë sigurohen që SHBA-ja të vendosin miliarda dollarë në fondin e riparimit pa pasur ndonjë rol vendimmarrës".

Presidenti i Panamasë Jose Raul Mulino ka hedhur poshtë pretendimet se Kina ka ndikim në menaxhimin e kanalit.

"Për hir të Zotit, nuk ka ushtarë kinezë, bota është e lirë të vizitojë kanalin," tha ai në një fjalim të enjten.

SHBA ka operuar për dekada me Kanalin e Panamasë përpara se t'ia dorëzonte këtij vendi në vitin 1999. Një degë e CK Hutchison Holdings, me bazë në Hong Kong, ka operuar prej kohësh dy porte të vendosura në hyrje të Kanalit të Panamasë në Karaibe dhe Paqësor.