Kampionët e KB Trepçës kanë nisur menjëherë punën për ndërtimin e skuadrës për sezonin e ri, duke zyrtarizuar përforcimin e parë vendor dhe një rinovim shumë të rëndësishëm.

Skuadrës mitrovicase i është bashkuar zyrtarisht lojtari me perspektivë, Rron Dahsyla (193 cm).

21-vjeçari, i cili është pjesë e kombëtares së Kosovës, vjen te Trepça pas një eksperience të suksesshme me skuadrën e Proton Cable Prizrenit, duke premtuar shumë për të ardhmen e "Minatorëve".

Në anën tjetër, Trepça ka siguruar stabilitet dhe përvojë në radhët e veta duke zgjatur bashkëpunimin edhe për një vit me basketbollistin amerikan, Kenny Hasbrouck.

Ish-lojtari i mjaft skuadrave evropiane dhe me përvojë të madhe ndërkombëtare, edhe pse në moshën 39-vjeçare, vazhdon të mbetet një shtyllë kryesore e ekipit, gjë që e dëshmoi edhe në ndeshjen e fundit ndaj Bashkimit ku kontribuoi me 10 pikë dhe 5 asistime në fitoren e thellë 98:78.

KosovaPress