Trajneri i Spanjës, Luis de la Fuente ka folur për mediat pas fitores ndaj Gjermanisë në çerekfinale të Kampionatit Evropian Euro 2024.

Spanja e mposhti sonte Gjermaninë 2:1 për ta siguruar biletën drejt gjysmëfinales së Euro 2024, raporton KosovaPress.

“Ky është momenti për të vlerësuar atë që kemi arritur dhe për të shijuar këtë moment. Fizikisht, do të shohim se si mund të përmirësohemi në ditët në vijim. Jam i sigurt se të gjithë lojtarët e mi janë gati për gjysmëfinalen. Ata po luajnë në një nivel shumë të lartë”, tha De La Fuente.

Më tej, De La Fuente u shpreh krenar që po stërvit “lojtarë të pangopur”.

Për fund, trajneri spanjoll tha se nata e sotme është historike, dhe se kombëtarja është e emocionuar që po e ka përkrahjen nga populli spanjoll.

“Kjo është një natë historike. Jam krenar që mund të përfaqësoj vendin tonë. Se sa larg do të arrijmë, do ta shohim, por jemi absolutisht të bindur se mund të arrijmë shumë larg me këtë ekip. Euforia jonë është plotësisht nën kontroll. Jemi shumë të lumtur, por e dimë që nesër është tashmë një ditë tjetër. Ne nuk mund të kontrollojmë atë që ndodh jashtë, por jemi të emocionuar që vendi po na mbështet”, tha De La Fuente.