Një muaj paraburgim i është caktuar B.R.-së, i dyshuar për veprat penale “Vrasje në tentativë” dhe “Mbajtje në pronësi, kontroll ose posedim të paautorizuar të armëve”.

Masa është caktuar për periudhën nga 18 korriku deri më 18 gusht 2026, ka konfirmuar për KosovaPress zëdhënësja e Gjykatës Themelore në Mitrovicë, Hateme Haxhaj.

Sipas Prokurorisë Themelore në Mitrovicë, rasti ka ndodhur më 18 korrik, kur i dyshuari B.R. dyshohet se ka tentuar ta privojë nga jeta të dëmtuarin B.M., duke e goditur me thikë në kokë, në pjesën e majtë të brinjwve dhe prapa kraharorit.

Si pasojë e këtyre veprimeve, sipas Prokurorisë, viktima ka pësuar lëndime të rënda trupore dhe aktualisht ndodhet duke u trajtuar në Klinikën e Kirurgjisë Torakale në Qendrën Klinike Universitare të Kosovës (QKUK).

Prokuroria Themelore në Mitrovicë kishte paraqitur kërkesë për caktimin e paraburgimit ndaj të dyshuarit, për shkak të dyshimit të bazuar se ka kryer veprat penale “Vrasje në tentativë” dhe “Mbajtje në pronësi, kontroll ose posedim të paautorizuar të armëve”.

B.R. është arrestuar më 18 korrik dhe, me vendim të prokurorit, është mbajtur në ndalim deri në vendimin e Gjykatës.