Tahiri: Qeveria Kurti në vend se të jep përgjegjësi për varfërimin e qytetarëve, po sulmon sistemin e drejtësisë
Lajme
Lexohet për: 2 min.
Shefi i Grupit Parlamentar të Aleancës për Ardhmërinë e Kosovës (AAK), Besnik Tahiri, ka reaguar ndaj Qeverisë së Kosovë, për siç thotë ai, sulmet ndaj sistemit të drejtësisë dhe ndaj dikastereve tjera shtetërore.
Tahiri në një postim në Facebook, ka shkruar se këto sulme kanë për qëllim shmangien nga përgjegjësia për varfërimin e qytetarëve.
"Sulmet ndaj sistemit të drejtësisë, kërcënimet dhe sulmet e ulëta ndaj Sindikatës së Arsimit, si dhe diskutimi se kur do të mbahen zgjedhjet, kur dihet mirë që 2024-ta është vit zgjedhor, kanë vetëm një qëllim: ikjen nga përgjegjësia për varfërimin e madh që po i bëhet qytetarit dhe dobësimit të Kosovës nga kjo qeveri", tha ai.
Sipas Tahirit, këto sulme kanë qëllim që në publik mos të flitet për ngritjen e çmimeve, çmimin e lartë të rrymës, pagat e pensionet e ulëta, bllokimin e investimeve e kapitale, ikjen e rinisë dhe shumë tema tjera.
“Pyetjet që duhet t'i bëhen Qeverisë janë: kur do ta ulni çmimin e energjisë? Kur do t'i rrisni pagat e pensionet? Kur do të përfundojnë rrugët Prishtinë-Podujevë, Prishtinë-Gjilan, Prishtinë-Gjakovë, Prishtinë-Mitrovicë dhe pse e ndalët autostradën e Dukagjinit?”, ka shkruar ai.