Ekipi olimpik që mori pjesë në Lojërat Olimpike Dimërore në Pekin tashmë është kthyer në Kosovë.

Skitari Albin Tahiri dhe skitarja Kiana Kryeziu e përfaqësuan Kosovën në garat e sllallomit të madh dhe lëshim alpik.

Ata nuk arritën të futeshin në zonën e medaljeve por arritën rezultatet më të mira të regjistruara ndonjëherë nga sportistët e Kosovës në këtë garë.

Me të zbarkuar në aeroportin "Adem Jashari" , të dy skitarët deklaruan se janë ndjerë krenar që e përfaqësuan Kosovën në një garë kaq të rëndësishme.

17 vjeçarja deklaroi se për atë ishte një eksperiencë e pa harruar duke falënderuar të gjithë kosovarët për pëkrahjen që i kanë dhënë

“Karriera ime sapo ka filluar, siç e dini unë jam 17 vjeçare, jam njëra prej garuesve më të reja që kam marr pjesë në olimpiadë. Ka qenë një eksperiencë e jashtëzakonshme, diçka që unë kurrë nuk do ta harroj edhe definitivisht ka qenë një prej eksperiencave që do ta mbaj gjithë jetën në mend...Definitivisht ka qenë një garë shumë sfiduese, një garë shumë e vështirë, e nivelit më të lartë dhe është një garë që do të më jap shumë eksperiencë edhe për të gjitha garat e tjera edhe ndoshta pjesën tjetër të karrierës do të ma bëjë edhe më të lehtë”, theksoi Kryeziu.

Ajo shtoi se është ndarë shumë e kënaqur me rezultatin e saj të arritur në Lojërat Olimpike Dimërore dhe se ishte nder i veçantë për ta përfaqësuar Kosovën si femra e parë në këtë garë.

“Kam qenë shumë e kënaqur me rezultatin që e kam arritur për shkak se siç e dini në sportin tonë nuk ka kategori të moshave as të peshave siç jemi mësuar në xhudo apo në sporte të tjera. Për mua thjeshtë të jem në të njëjtën garë me idhujt e mi edhe të garoj me to thjeshtë është një nder shumë i madh. Gjithashtu është edhe një ndër historik për ta përfaqësuar Kosovën si femra e parë në Lojërat Olimpike Dimërore”, tha ajo.

Kurse skitari Albin Tahiri dhe se është shumë i lumtur me rezultatin e arritur në aspektin personal por edhe për Kosovën. Ai shtoi se së bashku me Kianën kaluan shumë mirë dhe patën një eksperiencë të jashtëzakonshme.

“Po ndihem mrekullueshëm, siç kam thënë gjithmonë është krenari për mua që ta reprezantoj Kosovën. Unë jam shumë kranar me rezultatet më të mira, jo vetëm për Kosovën por edhe për mua. Jam shumë i lumtur me rezultatin. Kësaj here nuk isha vetëm por me kolegen dhe ishte shumë kënaqësi te jem atje së bashku me të...Për Kianën ndoshta ishte pak stresuese sepse ishte hera e parë ndërsa për mua pak a shumë isha mësuar tashmë dhe mendoj që herën tjetër ndoshta edhe më mirë”, tha Tahiri.

Albin Tahiri u rendit i 37-ti në garën e sllallomit të madh të në Lojërat Olimpike Dimërore,  ndërsa 17 vjeçarja Kiana Kryeziu e cila hyri në histori duke u bërë vajza e parë e cila e përfaqëson Kosovën në LOD, zuri vendin e 49 nga 82 garues në kategorinë e saj.