Anësori i Barcelonës, Lamine Yamal, tha të hënën se po merr frymëzim nga legjenda e basketbollit LeBron James dhe futbollisti brazilian Neymar për të provuar dhe frymëzuar një rikthim në Ligën e Kampionëve kundër Atletico Madrid.

Gjigantët katalanas humbën 2-0 javën e kaluar në ndeshjen e parë çerekfinale në shtëpi, por synojnë të arrijnë në katërshen e finales për të dytin vit radhazi duke u rikthyer të sonte në stadiumin Metropolitano .

Yamal e ndryshoi foton e profilit të tij në Instagram në një foto të James me trofeun e finales së NBA-së në vitin 2016, pasi ai udhëhoqi Cleveland Cavaliers drejt fitores ndaj Golden State Ëarriors, pavarësisht se ishin në disavantazh 3-1, duke shënuar një rikthim historik.

"Ai është një nga pikat e referimit që mund të më frymëzojë për ndeshjen e kthimit, prandaj e vendosa atje", u tha Yamal gazetarëve.

"Do të mendoj për atë që bëri ai dhe shpresoj që të ndodhë e njëjta gjë edhe për mua."

Më afër shtëpisë, anësori Neymar shkëlqeu teksa Barcelona bëri rikthimin më të madh në historinë e Ligës së Kampionëve në vitin 2017 kundër Paris Saint-Germain në 1/8 e finales.

Pas një humbjeje 4-0 në ndeshjen e parë në Paris, Barcelona regjistroi një fitore 6-1 për të arritur në çerekfinale.

"E kam parë atë ndeshje shumë herë dhe e kam parë edhe drejtpërdrejt", tha 18-vjeçari.

“Neymar është një lojtar që ka lënë gjurmë në të gjithë fëmijërinë time, ai është idhulli im, do t’i jem mirënjohës përgjithmonë për atë që i ka dhënë futbollit. Ai është lloji i lojtarit që blen një biletë për ta parë... Shpresoj që të jetë në Kupën e Botës."

Yamal shkëlqeu për Barcën sezonin e kaluar, teksa ata fituan një tripletë vendase, por fushata e tyre evropiane u ndërpre nga një humbje në gjysmëfinale nga Interi.

KosovaPress