Gjykata Supreme e Kosovës ka refuzuar si të pabazuar kërkesën për mbrojtje të ligjshmërisë të paraqitur në rastin që lidhet me një grup të dyshuar për krim të organizuar, trafikim të lëndëve narkotike dhe shpërlarje të parave.

Vendimi është marrë nga kolegji i Gjykatës Supreme në çështjen penale ndaj 20 të pandehurve, të cilët dyshohen për pjesëmarrje ose organizim të grupit kriminal të organizuar, trafikim të narkotikëve dhe shpërlarje të parave.

Mbrojtja kishte kundërshtuar aktvendimet e Gjykatës Themelore në Prishtinë dhe Gjykatës së Apelit, të cilat kishin vendosur vazhdimin e paraburgimit për të dyshuarit. Kërkesa për mbrojtje të ligjshmërisë ishte paraqitur nga mbrojtësi i të pandehurit Sh.B.

Sipas Gjykatës Supreme, nga provat e siguruara deri në këtë fazë ekziston dyshimi i bazuar se të pandehurit kanë kryer veprat penale që u vihen në barrë, ndërsa vërtetimi përfundimtar i tyre do të shqyrtohet gjatë procedurës gjyqësore.

Në arsyetimin e saj, Gjykata ka theksuar se ekzistojnë baza të mjaftueshme ligjore për vazhdimin e paraburgimit, duke iu referuar provave të mbledhura gjatë hetimeve, përfshirë komunikimet e siguruara përmes bashkëpunimit juridik ndërkombëtar, transkriptet e komunikimeve dhe kontaktet ndërmjet të dyshuarve.

Sipas dyshimeve, të pandehurit kanë vepruar si pjesë e një grupi të organizuar kriminal të përfshirë në trafikimin e lëndëve narkotike.

Gjykata Supreme ka vlerësuar gjithashtu se ekziston rreziku i ikjes së të pandehurve, duke marrë parasysh seriozitetin e veprave penale, dënimet e parapara me ligj, si dhe dyshimet se disa prej tyre kanë përdorur identitete të rreme ose kanë ndryshuar identitet për t’iu shmangur autoriteteve.

Po ashtu, sipas Supremes, në rast se të dyshuarit do të liroheshin, ekziston rreziku që ata të ndikojnë tek bashkëpandehurit, të koordinojnë deklaratat ose të pengojnë administrimin e provave.

Gjykata ka theksuar se masat më të lehta të sigurisë nuk do të ishin të mjaftueshme për të garantuar praninë e të pandehurve dhe zhvillimin normal të procedurës penale, duke lënë në fuqi vendimet e instancave më të ulëta për vazhdimin e paraburgimit.

/Kosovapress/