Një person ka sulmuar mbrëmë fizikisht një infermier të QKMF-së në Podujevë, pas tensioneve paraprake me një infermiere. QKMF e Podujevës ka njoftuar policinë lidhur me rastin dhe pret reagimin e organeve të ligjit. Mbrëmë rreth mesnatës derisa ekipi emergjent ishte në detyrë, një person ka penguar punën e tyre duke fyer dhe kanosur infermieren ndërkohë që ka eskaluar dhuna fizike ndaj infermierit tjetër të ekipit. Stafi menaxhues i QKMF-së shpreh indinjatë dhe dënon ashpër fyerjet dhe sulmin ndaj punëtorëve shëndetësorë.

“Sulmet e tilla ndaj punëtorëve shëndetësorë në vendet e tyre të punës janë shqetësuese dhe të papranueshme, ndërsa tolerimi i tyre krijon precedent të rrezikshëm për të ardhmen duke nxitur pasiguri në punë në mesin e komunitetit shëndetësor,” thuhet në reagim. QKMF në Podujevë për shkak të shqetësimeve ka bërë të ditur se ka liruar përkohësisht në shtëpi infermierin dhe infermieren.