Një sukses historik për ekipin e Washington State Cougars dhe basketbollisten nga Kosova Astera Tuhina, që është shpallur kampion i turneut PAC-12, duke mposhtur UCLA me rezultat 65:61 të dielën në Las Vegas.

Skuadra e Washington ishte numër 7 dhe është bërë skuadra me nivelet më të ulëta që përparoi dhe fitoi titullin e PAC-12.

Ky ishte një sukses historik, pasi është ekipi i parë sportiv të garave të Shtetit të Uashingtonit që kurorëzohet me titullin PAC-12. Meshkujt e kishin fituar para 80 vjetësh.

Cougars do të kërkojnë të sigurojnë fitoren e parë të programit në turneun NCAA më vonë këtë muaj.

Astera Tuhina ka luajtur rol kyç në triumfin e ekipit të saj në debutimin e saj në këtë ligë. Tuhina në finale ka luajtur për 31 minuta, duke realizuar gjashtë pikë, gjashtë asistime dhe tri kërcime, duke marrë vlerësime shumë pozitive për paraqitjen në finale, por edhe gjatë gjithë këtij edicioni.

Fjalë shumë të mira kishte edhe trajnerja e saj. “Ajo në të vërtetë nuk është ‘studente’ e re. Ne e dinim që ditën e parë kur na është bashkuar ajo. Astera është larguar nga shtëpia në moshën 14 vjeçare për të luajtur në Spanjë. Është një lloj fëmije e veçantë. Ka inteligjencë të lartë. Jam krenare dhe e lumtur për paraqitjen e saj. Tezja e saj që jeton në SHBA erdhi dhe e befasoi këtë mëngjes”, ka thënë Ethridge.

Astera është një nga basketbollistet më të talentuara të Kosovës, ku ka luajtur për Kosovën A dhe grupmoshat e reja. Tuhina është shpresa e Kosovës.