Stojkoviq për situatën në Kosovë: Serbët të tërhiqen, të refuzojnë ndërhyrjet e Vuçiqit
Lexohet për: 4 min.
1 vit më parë
Linku u kopjua
Presidenti i Serbisë, Aleksandar Vuçiq, është i vetmi përgjegjës për të gjitha ngjarjet në veri të Kosovës, sepse çdo vendim individual që ka sjellë deri tek kjo gjendje është vetëm përgjegjësi e tij, tha kryetari i shoqatës Oktobar, Çedomir Stojkoviq.
Ai ka pohuar se serbët e Kosovës janë shantazhuar nga Beogradi zyrtar, gjegjësisht nga vet Vuçiqi.
“Ata janë shantazhuar që të bojkotojnë zgjedhjet, që do të thotë se Aleksandar Vuçiq ka ndërhyrë drejtpërdrejt në proceset demokratike në veri të Kosovës, duke i penguar, në kundërshtim me të gjitha standardet dhe veçanërisht në kundërshtim me traditën demokratike të Evropës, por edhe të Shteteve të Bashkuara të Amerikës, të cilat ndërmjetësuan që të arrihet pajtimi, pra një marrëveshje”, ka thënë ai për një medium serb.
Sipas tij, tani në Kosovë po ndodh një realitet tjetër nga ai që u kishte premtuar serbëve Aleksandar Vuçiq kur “urdhëroi serbët të bojkotojnë zgjedhjet”.
“Serbët tani duhet të dalin para KFOR-it, bashkësisë ndërkombëtare dhe autoriteteve të Kosovës me këtë fakt dhe të shpallin se vendimet për bojkot për shkak të ndërhyrjes agresive të Aleksandar Vuçiqit në procesin zgjedhor nuk janë vendime të tyre zgjedhore, por rezultat i shantazhit politik dhe një pohim i tillë është më se i mjaftueshëm, arsye për të vënë në pikëpyetje legjitimitetin e bojkotit dhe për rrjedhojë për të fituar zgjedhje të reja”, tha kryetari i shoqatës Oktobar.
Serbët nga veriu i Kosovës, siç tha ai, duhet ta dinë, por edhe duhet të thonë se Aleksandar Vuçuq i ka mashtruar, sepse sipas tij, ai nuk ka mundur të mos e dijë se do të ndodh kjo pasojë e bojkotit.
“Tani serbët nga Kosova duhet të tërhiqen menjëherë nga bllokadat dhe menjëherë të kërkojnë zgjedhje të reja me arsyetimin se janë shantazhuar nga Beogradi që t'i bojkotojnë këto dhe se u është premtuar zhvillimi i ngjarjeve ndryshe nga këto, dhe të mbajnë tubime demokratike për këtë nëse është e nevojshme, për të treguar vullnetin e tyre të vërtetë për zgjedhje të reja, për shkak të mashtrimit të Aleksandër Vuçiqit, dhe më pas të integrohen në sistemin juridik të Kosovës pas përfundimit të tyre përmes negociatave të drejtpërdrejta me bashkësinë ndërkombëtare”, tha ai.
Sipas tij, bashkësia ndërkombëtare nuk duhet të harrojë faktin se Aleksandar Vuçiq ka refuzuar të nënshkruajë marrëveshjen e Ohrit dhe se ai më pas ka thënë në mediat serbe se “serbët nuk duhet ta tradhtojnë atë”, dhe se “duhet ta lënë të mashtrojë bashkësinë ndërkombëtare nëse ky është plani i tij”, dhe se ishte pikërisht ai që urdhëroi serbët të bojkotojnë zgjedhjet dhe kështu solli sot këto pasoja.
“Nga e gjithë kjo rezulton se Vuçiq ka hyrë në Marrëveshjen e Ohrit që në fillim jo me mirëbesim, por me keqbesim dhe me qëllimin real për të mos e zbatuar atë. Dhe kjo po tregohet pikërisht tani në terren, sepse Vuçiq fillimisht urdhëroi bojkotimin e atyre zgjedhjeve, si rezultat i së cilës serbët nuk janë në pushtet në komunat veriore, dhe tani ai do të përdorë pikërisht këtë fakt për të bllokuar zbatimin e Marrëveshjes, sepse është e qartë se Bashkësia e Komunave Serbe nuk mund të formohet në mënyrë legjitime pa pjesëmarrjen e atyre serbëve në formim, gjë që nuk mund të ndodhë nëse serbët bojkotojnë ato zgjedhje dhe po i bojkotojnë me urdhër të Vuçiqit”. përfundon Stojkoviq.
Që nga e premtja, serbët në veri të Kosovës janë duke protestuar kundër kryetarëve të rinj të dalë nga zgjedhjet e 23 prillit.
Dje (e hënë), protestuesit me maska e edhe ata pa maska kanë ushtruar dhunë ndaj pjesëtarëve të KFOR-it, Policisë së Kosovës dhe gazetarëve. Ata kanë hedhur gjësende të ndryshme në drejtim të paqeruajtësve, derisa kanë dëmtuar vetura të mediave, duke e djegur tërësisht veturën e një televizioni.
Si pasojë e protestave të dhunshme një ditë më parë, u plagosën 30 ushtarë të KFOR-it.
