Numri i viktimave në sulmet me bomba nga grupi militant Al-Shabaab në Somalinë qendrore është rritur në 35, tha sot një zyrtar i lartë i policisë.

Dy bomba të vendosura nën makina u shpërthyen nga militantët e Al-Shabaab në rajonin qendror somalez të Hiranit, tha sot një nga banorët që morën pjesë në operacionin e shpëtimit.

Ushtarë, anëtarë të milicisë dhe civilë u vranë dhe dhjetëra u plagosën, tha Abdulahi Osman, një tregtar nga Mahas.

Sipas tij, nga sulmi janë shkatërruar edhe shumë shtëpi.

Komisionari i Qarkut Mahas, Mumin Mohamed Halane i tha radios shtetërore se shtëpia e tij dhe shtëpia e një ligjvënësi federal ishin në shënjestër të sulmuesve.

Al Shabaab mori përgjegjësinë për sulmin, duke thënë se objektivi ishte "milicia dhe ushtarë renegatë".

Dega e Al-Kaedës Al-Shabaab ka udhëhequr një rebelim kundër qeverisë somaleze që nga viti 2007.

Forcat qeveritare dhe klanet e milicisë aleate të njohura si Makavizli e shtynë grupin militant nga Hirani vitin e kaluar, por al-Shabaab ka vazhduar të kryejë sulme.

Forcat qeveritare dhe Makavizli morën mbështetje nga trupat e SHBA-së dhe Bashkimit Afrikan.

Pavarësisht ofensivës nga forcat qeveritare, al-Shabaab ka kryer sulme të shpeshta muajt e fundit, duke përfshirë disa sulme ndaj objekteve qeveritare dhe hoteleve në kryeqytetin, Mogadishu.