Një shpërthim i madh goditi kryeqytetin iranian, Teheran, të premten në një shesh të mbushur me demonstrues, njoftoi televizioni shtetëror iranian, sipas AP.

Shpërthimi ndodhi në Sheshin Ferdowsi, pranë Rrugës Enghelab dhe jo larg Universitetit të Teheranit, që është epiqendra e demonstratave të përvitshme për Ditën e Quds-it (Jerusalemit), shkruan AP, transmeton KosovaPress.

Video e publikuar nga agjencia gjysmëzyrtare Tasnim tregon një re tymi gri duke u ngritur, ndërsa demonstruesit brohorisnin “Vdekje Izraelit!” dhe “Vdekje Amerikës!”.

Shkaku i shpërthimit nuk ishte i qartë menjëherë, por lajmi vjen pas një paralajmërimi të Izraelit për një sulm të mundshëm në këtë zonë, pranë Universitetit të Teheranit, ku po zhvilloheshin demonstratat e Ditës së Quds-it.

Sipas paralajmërimit të lëshuar të premten, ushtria izraelite do të kryente operacione në zonën pranë Rrugës Enghelab dhe Universitetit të Teheranit. Mesazhi paralajmëronte qytetarët: “Ju lutemi të evakuuoni menjëherë zonën e shënuar në hartë. Prania juaj këtu rrezikon jetën tuaj”.

Demonstruesit zakonisht mblidhen në Universitetin e Teheranit për lutjet e së premtes, dhe sheshi mbushet me qytetarë që më pas vazhdojnë me marshimet dhe protestat e Ditës së Quds-it.

Dita e Quds-it, ose Dita e Jerusalemit, është një ditë vjetore e shprehur kryesisht në Iran dhe disa vende të tjera myslimane për të protestuar kundër okupimit izraelit të territoreve palestineze dhe për të shprehur mbështetje për popullin palestinez.