Departamenti Amerikan i Shtetit (DASH), të hënën ka sanksionuar ish-kryetarin e komunës së Kaçanikut, Xhabir Zharku, për shkak të përfshirjes së tij në veprime korruptive. Me këtë vendim, Zharkut i ndalohet hyrja në Shtetet e Bashkuara të Amerikës.

Sipas njoftimit të DASH-it, Zharku gjatë mandatit të tij si kryetar ka abuzuar me detyrën zyrtare, duke ndërhyrë në mënyrë të paligjshme në proceset e prokurimit dhe duke i dhënë leje të paligjshme për ndërtime në pronat komunale me qëllim të përfitimeve personale dhe të afërmve të tij.

“Në cilësinë e tij zyrtare si kryetar i komunës së Kaçanikut, Kosovë, Zharku ishte i përfshirë në akte korruptive, duke përfshirë përdorimin e pozitës së tij për të ndërhyrë në proceset e prokurimit për të lejuar në mënyrë të paligjshme ndërtimin në pronën në pronësi të komunës, për të përfituar vetë dhe bashkëpunëtorët e tij”, thuhet në deklaratën e DASh-it.