Sekretari amerikan i Mbrojtjes Lloyd Austin njoftoi sot një paketë ndihme ushtarake për Ukrainën me vlerë deri në 6 miliardë dollarë. "Unë jam gjithashtu i kënaqur të njoftoj sot një angazhim shtesë prej 6 miliardë dollarësh përmes Iniciativës sonë të Asistencës për Sigurinë në Ukrainë që do të na lejojë të prokurojmë aftësi të reja për Ukrainën nga industria amerikane," tha Austin në një konferencë shtypi pas një takimi virtual të Grupit të kontaktit për mbrojtjen e Ukrainës. "Kjo është paketa më e madhe e asistencës për sigurinë që ne kemi angazhuar deri më sot," shtoi ai.

Pentagoni njoftoi të mërkurën një paketë të re armësh për Ukrainën, disa minuta pasi presidenti Joe Biden nënshkroi ligjin për shpenzimet prej 95 miliardë dollarësh që financon prioritetet e tij të sigurisë kombëtare, duke përfshirë më shumë se 60.8 miliardë dollarë për Ukrainën. Kësti i parë i ndihmës vlerësohet deri në një miliard dollarë dhe përfshin raketa të mbrojtjes ajrore RIM-7 dhe AIM-9M, raketa antiajrore Stinger, armë të vogla dhe municione shtesë, duke përfshirë predha të kalibrit 0.50 për të luftuar dronët, sipas në një deklarate. /AA