Kancelari gjerman Olaf Scholz u bëri sot thirrje ligjvënësve të opozitës për mbështetjen e tyre në miratimin e legjislacionit vendimtar përpara zgjedhjeve të parakohshme të planifikuara për muajin shkurt 2025, ndërsa njoftoi synimin e tij për të kërkuar një votëbesim më 11 dhjetor.

Në një fjalim në parlament, Scholz bëri thirrje për bashkëpunim midis partive demokratike përballë sfidave ekonomike dhe sociale.

"Le të punojmë së bashku për të mirën e vendit deri në zgjedhjet e reja," kërkoi ai, duke theksuar nevojën për kompromis në javët e ardhshme.

Kancelari socialdemokrat mbrojti vendimin e tij të fundit për të shkarkuar ministrin liberal të financave dhe për t'i dhënë fund koalicionit me Demokratët e Lirë (FDP), duke e përshkruar atë si "të drejtë dhe të pashmangshëm" për shkak të dallimeve të vazhdueshme.

Scholz shprehu kënaqësinë për marrëveshjen e arritur mes grupeve parlamentare demokratike për procesin e zgjedhjeve të reja.

"Jam shumë i kënaqur që grupet parlamentare në Bundestagun gjerman tani kanë arritur një marrëveshje se si zgjedhjet e reja mund të zhvillohen shpejt dhe në mënyrë të rregullt," tha ai.

Kancelari përshkroi planet e tij për të iniciuar procesin e zgjedhjeve të parakohshme, të caktuara për 23 shkurt, siç është rënë dakord me Kristian Demokratët e opozitës.

"Unë do të bëj pjesën time për të siguruar që kjo të jetë e mundur," tha Scholz.

Ai njoftoi synimin e tij për të kërkuar një votëbesim më 11 dhjetor, ndërsa vendimi parlamentar pritet më 16 dhjetor.

“Kjo do të jetë baza për zgjedhjet e reja në Gjermani, duke i lejuar qytetarët tanë të vendosin përfundimisht se si duhet të vazhdojnë gjërat në vendin tonë”, shtoi Scholz.

Sipas kushtetutës gjermane, zgjedhjet e parakohshme mund të mbahen nëse kancelari humb votë besimin në Bundestag. /AA