Sindikata e Bashkuar e Arsimit, Shkencës dhe Kulturës (SBAShK) i ka propozuar Bashkimit të Sindikatave të Pavarura të Kosovës (BSPK) që të mbyllet greva, që ishte pezulluar më 1 tetor.

Pas takimin me kryetarë të nivelit komunal sindikal dhe universiteteve, SBASHK-u ka thënë se i është përmbushur kërkesa kryesore, pra ajo e miratimit të Ligjit për Paga.

Në njoftim thuhet se, në përmbyllje të vitit 2022, Sindikata e Bashkuar  e Arsimit dhe Shkencës së Kosovës (SBAShK) ka mbajtur takim me kryetarët e nivelit komunal sindikal dhe të Universiteteve.  Fillimisht janë takuar anëtarët e kryesisë dhe të Këshillit Grevist dhe kanë analizuar situatën aktuale.

Duke u nisur nga fakti se Ligji i pagave është votuar nga Parlamenti dhe pritet të nis implementimi i tij në shkurtin e vitit 2023 e që ishte kërkesë kryesore e SBASHK-ut, Kryesia dhe Këshilli Grevist kanë dalë para kryetarëve të nivelit komunal sindikal e të Universiteteve me propozimin që SBASHK-u t’i drejtohet BSPK-së që të merret vendim për mbylljen e grevës së pezulluar më 1 tetor 2022. Këtë propozim pjesëmarrësit e këtij takimi e kanë aprovuar unanimisht pas diskutimeve që janë zhvilluar lidhur me këtë çështje.

Pas kësaj kryetarët e nivelit komunal sindikal dhe të Universiteteve kanë marrë nga një  ekzemplarë të revistës vjetore  “Rrugëtimi i SBASHK-ut 2022” për secilën shoqatë sindikale në komunat e tyre, gjegjësisht në Universitete.

Në këtë takim u mor vendim që të përgatitet një agjendë e takimeve nëpër komuna dhe Universitete, e cila do të nis se realizuari nga janari i vitit 2023.