Rusia nis sulme të reja në Ukrainë, vriten tre persona
Forcat ruse kanë sulmuar disa qytete të Ukrainës, duke vrarë të paktën tre persona në një sulm me dron në një zonë të banuar të rajonit të Kievit.
Katet e sipërme të dy ndërtesave të banimit janë goditur herët të mërkurën në qytetin e Rzhyshchiv, në periferi të kryeqytetit, shkruan BBC, përcjell KosovaPress
Një 11-vjeçar ka qenë mes viktimave, kanë bërë të ditur shërbimet e shpëtimit.
Shpërthime janë raportuar nga banorët në qytetin port të Sevastopolit.
Kreu i autoritetit pushtues të Rusisë, Mikhail Razvozhaev ka thënë se tri "objekte" që kanë synuar flotën e Detit të Zi janë shkatërruar dhe anijet luftarake ruse nuk janë dëmtuar.
Nuk ka pasur asnjë koment nga ushtria e Ukrainës, e cila në fillim të kësaj jave ka thënë se ka shkatërruar raketa të destinuara për flotën në një qendër hekurudhore në Dzhankoi në Krimenë veriore.
Presidenti ukrainas, Volodymyr Zelensky ka thënë se Rusia kishte lëshuar më shumë se 20 "dronë vrasës", si dhe raketa dhe predha.
Duke iu referuar largimit të presidentit kinez, Xi Jinping nga Rusia disa orë më parë, ai ka thënë se sa herë që është shqiptuar fjala “paqe” në Moskë, është dhënë një urdhër tjetër për të nisur sulmet.
