Lideri i AAK-së Ramush Haradinaj ka thënë se Serbia mund ta shfrytëzojë situatën e krijuar pas vrasjes së një polici serb, për të akuzuar Kosovën dhe për të bërë një kundërvlerë të asaj që ka ndodhur me sulmin terrorist në Banjska.

“Kosova ka dy humbje tjera, pos jetës së një qytetari tonë si Fatoni - ka rënë nga provimi edhe shteti ligjor i Kosovës dhe sistemi korrektues. Humbja tjetër e radhës është se Serbia do ta shfrytëzojë këtë situatë për të akuzuar Kosovën dhe për të bërë një kundërvlerë të asaj që ka ndodhur me sulmin terrorist në Banjskë”, ka thënë Haradinaj.

Ai në Debat Plus të TV Dukagjinit e ka quajtur të vështirë lidhjen mes Faton Hajrizit dhe Serbisë.

“Faton Hajrizi nuk ka pasur ndonjë afërsi me Serbinë në çfarëdo forme. Kjo është vërtetuar edhe në ballafaqimin e tij me policët. Ai nuk ka dashur as të dorëzohet në duar të Serbisë”, ka thënë Haradinaj.

Ndryshe, lidhur me rastin e pretenduar nga Serbia të vrasjes së një qytetari të Kosovës në Serbi, Ministria e Punëve të Jashtme dhe Diasporës e Kosovës ka bërë të ditur se autoritetet serbe, më datë 22 korrik kanë dërguar shenjat e gishtërinjve të një personi.

“Të njëjtat shenja së bashku me shenjat e gishtërinjve të qytetarit të Kosovës, Faton Hajrizi, janë përcjellë në Agjencinë e Kosovës për Forenzikë, ku pas krahasimit nga AKF, ILECU ka pranuar përgjigje se këto gjurmë i përkasin qytetarit të raportuar si i vrarë, Faton Hajrizi. Duke lutur opinionin që të gjitha këto lajme nga Serbia të merren me rezervë deri në konfirmimin e plotë të tyre, Ministria e Punëve të Jashtme dhe Diasporës do t’ju mbajë të informuar sapo të ketë informacione të reja në lidhje me këtë rast,” thotë MPJD.