Kombëtarja e Shqipërisë mbërriti sot në Aeroportin e Rinasit, pas eliminimit mbrëmë nga Kampionati Evropian Euro 2024.

Shqipëria u mposht mbrëmë nga Spanja me rezultat minimal 1:0, humbje kjo e cila edhe zyrtarisht e eliminoi nga Euro 2024, raporton KosovaPress.

Pas mbërritjes në Rinas, mesfushori i Shqipërisë, Ylber Ramadani foli për mediat, ku u pa i zhgënjyer me eliminimin nga Evropiani, por që e cilësoi si një “eksperiencë që do të na shërbejë për të ardhmen”.

“U ndjeva shumë mirë po i zhgënjyer që nuk mundëm ta vazhdojmë. Provuam të japim më të mirën, por dëshironim të shkonim më shumë. Përkrahja e shqiptarëve ka qenë fantastike dhe që do të rrijë në memorien time, por kjo është një eksperiencë që do të na shërbejë për të ardhmen. Do duhej të kishim bërë më shumë me Kroacinë, dhe dje e meritonim një pikë… trajneri na tha se ishte krenar me ne sepse kemi luajtur përballë skuadrave të forta”, tha Ylber Ramadani. /tch/