Në Prokurorinë Themelore të Mitrovicës, Departamenti për Krime të Rënda, Radoica Radomiroviq ka dorëzuar një kallëzim penal kundër personave zyrtarë përgjegjës dhe personave të tjerë që mund të identifikohen gjatë procedurave hetimore, lidhur me dyshimet për keqpërdorime në realizimin e projekteve publike në Komunën e Leposaviqit.

Sipas kallëzimit, ekzistojnë dyshime të bazuara për kryerjen e veprave penale që ndërlidhen me keqpërdorimin e mjeteve publike, mashtrimin dhe keqpërdorimet në prokurimin publik, falsifikimin e dokumenteve zyrtare, si dhe veprime të tjera që lidhen me menaxhimin, miratimin, likuidimin dhe pagesën e projekteve publike në këtë komunë.

Në dokument thuhet se kallëzimi është drejtuar ndaj personave përgjegjës në Komunën e Leposaviqit, autoritetit kontraktues, njësive që kanë iniciuar procedurat e prokurimit, zyrtarëve të prokurimit publik, menaxherëve të kontratave, personave përgjegjës për pranimin e punimeve dhe shërbimeve, zyrtarëve financiarë, si dhe personave të autorizuar për miratimin, likuidimin dhe realizimin e pagesave.

Në dosjen e bashkëngjitur përmenden edhe disa persona dhe kompani, për të cilët kallëzuesi kërkon që të jenë pjesë e hetimeve. Sipas dokumentit, statusi procedural, roli dhe shkalla e përgjegjësisë së secilit person duhet të përcaktohen përmes hetimeve dhe sigurimit të dokumentacionit përkatës, përfshirë dokumentet e prokurimit, evidencat financiare, dokumentacionin kontabël, të dhënat bankare dhe autorizimet zyrtare.

Kallëzimi bazohet në dispozitat e Kodit të Procedurës Penale dhe Kodit Penal të Kosovës, duke përfshirë veprat penale që lidhen me keqpërdorimin e pozitës apo autoritetit zyrtar, mashtrimin dhe keqpërdorimin në prokurimin publik, konfliktin e interesit, përvetësimin në detyrë, mashtrimin në shërbim dhe falsifikimin e dokumenteve zyrtare.

/Kosovapress/