Shitja e parë e hapur e biletave për Kupën e Botës 2026 ka zbuluar shifra rekord, ku një biletë për finalen e madhe arrin deri në 10,990 dollarë.

Sipas BBC Sport, ky konsiderohet si çmimi më i lartë i regjistruar ndonjëherë për një hyrje të thjeshtë (general admission) në një ndeshje futbolli.

Kjo rritje është parë me skepticizëm, pasi në planet fillestare të kandidaturës së SHBA-së, Kanadasë dhe Meksikës, ishte premtuar se çmimi maksimal për finalen nuk do t'i kalonte 1,550 dollarët.

Përveç kostove të larta, tifozët u përballën me pritje të gjata deri në gjashtë orë dhe defekte teknike në faqen zyrtare të FIFA-s.

Raportohet se institucioni po përdor "çmimet dinamike", duke i rritur ato në bazë të kërkesës, gjë që u cilësua nga kritikët si një "tradhti monumentale".

FIFA ka njoftuar se: "Bileta të reja mund të nxirren në shitje për çdo ndeshje deri në momentin e fillimit të lojës".

KosovaPress