Me rastin e Ditës Botërore të Lirisë së Shtypit, regresi që ka shënuar Kosova në Indeksin e Reporterëve Pa Kufij, duke rënë për 19 vende, nga pozita 56 në 75, po konsiderohet gjendje shqetësuese dhe alarmante për mediat në vendin tonë.
Qasja jo e duhur e qeverisë ndaj mediave në Kosovë, po vlerësohet të jetë ndër shkaktarët kryesor për këtë rënie në renditje. Asociacioni i Gazetarëve të Kosovës, Këshilli i Mediave të Shkruara të Kosovës dhe Komisioni i Pavarur për Media, në diskutimin e mbajtur për sfidat e ruajtjes së standardeve profesionale dhe kodit të etikës gjatë raportimit, theksuan se qeveria duhet të bëjë veprime konkrete në përmirësimin e situatës aktuale.
Shefi i misionit të OSBE-së në Kosovë, Michal Davenport potencoi se gjatë 12 muajve të fundit ka pasur rritje të dhunës drejt gazetarëve. Ai tha se fokusimi i OSBE-së ka të bëjë me konsolidimin e aftësive të gazetarëve, redaktorëve dhe mediave në përgjithësi, duke përfshirë edhe fokusimin në promovimin dhe integritetin e standardeve etike.
Drejtori i Këshillit të Mediave të Shkruara në Kosovë, Imer Mushkolaj tha se përpjekja e qeverisë për ta zvogëluar besimin e mediave në publik, ka ndikuar në vështirësimin e punës së gazetarëve. Ai tha se qasja jo e duhur e qeverisë, ka bërë që gazetarët të jenë cak i lehtë i sulmeve dhe pengimit në kryerjen e punës së tyre.
Drejtori i Radios “ Romano Avazo”, Fatmir Menekshe tha se jo vetëm partia në pushtet, por edhe partitë e tjera po ndikojnë në pengimin e mediave për ta kryer punën e tyre. Ai tha se kjo po ndikon jo vetëm te mediat qendrore, por edhe tek ato komunitare.
Në raportin vjetor të Organizatës Botërore “Reporterët pa Kufij” për vitin 2023, Kosova është ngritur për pesë vende (56) në krahasim me vitin 2022, kur renditej në pozitën 61. 3 Maji është Dita Botërore e Lirisë së Shtypit që nga viti 1993 nga Asambleja e Përgjithshme e Kombeve të Bashkuara.
