Shifrat për rritje ekonomike nga Qeveria po konsiderohen të jenë joreale dhe propaganduese. Kështu vlerësojnë njohës të ekonomisë dhe opozita, për dallim nga partia në pushtet, të cilët thonë se ekonomia e vendit ka vazhduar rritjen në tremujorin e katërt gjatë vitit të kaluar.

Derisa nga opozita shprehen të shqetësuar që gjendja ekonomike në vend është përkeqësuar dhe është në gjendje jo të mirë, konsiderojnë se Qeveria Kurti nuk e ka plotësuar asnjë premtim sa i përket investimeve kapitale. Ndërkaq, këtë e mohojnë nga Lëvizja Vetëvendosje.

Deputeti nga pozita, Armend Muja thotë se ky vit do të jetë rekord në realizimin e investimeve kapitale, për çfarë thotë se rritja do të jetë mbi 4 për qind.

Muja derisa numëron faktorët që po ndikojnë në përmirësimin e ekonomisë në vend, thekson se Kosova është karakterizuar me rritje shumë të lartë ekonomike se pjesa tjetër e Evropës.

Derisa deputeti nga Lidhja Demokratike e Kosovës, Besian Mustafa konsideron se kjo qeveri ka filluar një propagandë duke krijuar numra që janë në shkëputje tërësisht nga realiteti ekonomik.

Mustafa shton se kjo qeveri nuk e ka përmbushur asnjë premtim të investimeve kapitale për tre vite nga ardhja në pushtet, për çfarë vlerëson se kanë dështuar në qeverisje.

Ndërsa, deputeti nga Aleanca për Ardhmërinë e Kosovës, Pal Lekaj thotë se në vend rritja ekonomike është vetëm 3.3 për qind, jo më e madhe.

Se vendi gjendet në një situatë jo të mirë ekonomikisht e thonë edhe njohës të ekonomisë. Kryetari i Odës Ekonomike Amerikane, Arian Zeka thotë për KosovaPress, se shifrat e publikuara nga qeveria se ka rritje ekonomike, nuk janë reale.

Edhe kryetari i Odës Ekonomikë të Kosovës, Lulzim Rafuna vlerëson se shifrat janë shumë të ulta, sa që nuk lënë asnjë gjurmë në zhvillim ekonomik të vendit.

Në anën tjetër, ministri i Financave, Hekuran Murati ka deklaruar se ekonomia e vendit ka vazhduar rritjen në tremujorin e katërt gjatë vitit të kaluar.

Ai në Facebook ka shkruar se sipas Agjencisë së Statistikave të Kosovës për tremujorin e katërt 2023, rritja reale e ekonomisë ishte 3.96 për qind.

“Në grafikun më poshtë mund të shihni edhe krahasimin e performancës ekonomike të vendit nëpër vite. Përderisa me qeveritë e kaluara për tri vjet ekonomisë i shtoheshin vetëm një miliard euro, me Qeverinë Kurti për periudhën e njëjtë ekonomisë i janë shtuar 2.9 miliardë euro apo mesatarisht gati një miliard në vit”, ka shkruar Murati.

Lajmi i plotë në sistemin me parapagim...