Gjashtë aktivistë të Partisë Socialdemokrate, përfshirë kryetarin Dardan Molliqaj, janë ndaluar për 48 orë nga prokuroria, pas protestës së sotme kundër vizitës së kryetares së Dhomave të Specializuara Ekaterina Trendafilova në Prishtinë.
“Prokuroria ka vendosur që kryetarit të PSD-së, Dardan Molliqaj, Zgjim Hysenit, Nol Nushit, Agron Kabashit, Korab Korçës dhe Gent Brahimit t'iu jep masën e ndalimit për 48 orë”, thuhet në njoftimin e PSD-së.“Për PSD-në ky vendim është i papranueshëm dhe kërkojmë lirimin e aktivistëve tonë”, përfundon njoftimi.
Anëtarë të PSD-së porsa përfunduan fjalimet politike kundër Gjykatës Speciale, hodhën mjete shpërthyese dhe tymuese ndaj pjesëtarëve të Policisë së Kosovës, të cilët në numër të madh po e ruanin objektin ku po mbahej takimi i Trendafilovës me shoqërinë civile.
Kjo nxiti reagimin e njësive më elite të policisë të cilët arrestuan kryetarin e PSD-së, Dardan Molliqaj dhe pesë anëtarëve të tjerë të kësaj partie. Policia shpërndau pjesën tjetër të protestuesve përmes gazit lotsjellës dhe sprejt, ku nuk kursyen as gazetarët, me ç’rast disa prej tyre edhe u lënduan.