Presidentja e Gjeorgjisë Saloma Zurabishvili, e cila mbështetet nga Perëndimi dhe nuk është dakord me qeverinë, tha sot se vendi i saj ishte viktimë e një operacioni special rus në zgjedhjet parlamentare, të cilat ajo i konsideroi të manipuluara.

“Ne jemi dëshmitarë dhe viktima të një operacioni special rus, një formë moderne e luftës hibride kundër popullit gjeorgjian”, tha ajo, pa hyrë në detaje.

Partia në pushtet, fituesja e zgjedhjeve, akuzohet se dëshiron ta afrojë vendin me Moskën.

Zurabishvili tha sonte se nuk i njeh rezultatet e zgjedhjeve parlamentare të së shtunës dhe bëri thirrje për protesta në rrugë të hënën.

Sipas numërimit paraprak të votave, partia në pushtet “Ëndrra gjeorgjiane fitoi zgjedhjet me 55 për qind të votave, njoftoi komisioni zgjedhor.

Opozita është e ndarë në disa blloqe dhe më popullorja, Koalicioni për Ndryshim, ka marrë 11 për qind të votave. Koalicioni për Ndryshim tha se nuk do të marrë mandatet e tij parlamentare për shkak të dyshimeve për mashtrime zgjedhore.

"Ne nuk do t'i japim legjitimitet vjedhjes së votave nga populli gjeorgjian, ne heqim dorë nga mandatet tona parlamentare", tha Nana Malashhia nga Koalicioni për Ndryshim, sipas mediave.

Vëzhguesit gjeorgjianë dhe ndërkombëtarë gjetën shumë parregullsi në zgjedhje, duke përfshirë frikësimin e votuesve, presionin ndaj autoriteteve, dhunën ndaj vëzhguesve, blerjen e votave, votim të shumëfishtë dhe më shumë fletë votimi në kuti sesa votues.

Megjithëse Vladimir Putin dështoi në Moldavi, situata në Gjeorgji mund të jetë e ndryshme për shkak të afërsisë së saj me Rusinë dhe mbështetjes financiare të Kremlinit për partitë pro-ruse.