Në mungesë të kuorumit, ka dështuar të mbahet mbledhje e Komisionit për të Drejtat e Njeriut, në të cilën do të shqyrtohej peticioni i Sindikatës së Policisë se Kosovës. Kjo për shkak se munguan deputetët nga mazhoranca.

Megjithatë, kryetarja e këtij komisioni, Duda Balje bashkë me deputetët e tjerë të opozitës që ishin prezent, vendosen që të mbajnë dëgjim publik.

Balje tha se pavarësisht që s’ka kuorum, do të respektohet Sindikata e Policisë.

Kryetari i Sindikatës së Policisë së Kosovës, Imer Zeqiri ka renditur sërish kërkesat e Policisë që janë të shkruara në peticion.

Zeqiri mes tjerash ka propozuar që mos të bëhen shkelje ligjore në këtë drejtim, pasi siç tha ai, detyrohen që me vendimet e Gjykatës t’i realizojnë të drejtat e Policisë.

Ndërsa, nënkryetari i sindikatës, Avni Hoti ka adresuar ankesa ndaj pozitës dhe opozitës për veprimet që po bëjnë karshi PK-së.

Hoti ka bërë thirrje që mos të bëhet kauza politike mbi Policinë e Kosovës.

Me këtë u pajtua edhe deputetja, Balje. Ajo bëri thirrje qeverisë të marrë me seriozisht kërkesat e Policisë së Kosovës.

Ndërkaq, deputetja nga PDK, Ariana Musliu-Shoshi i është përgjigjur Hotit, duke thënë se gjithë çfarë kanë sot Policia, janë nga partitë e kaluara.

Në mbledhje ishin edhe deputetet, Marigona Geci nga LDK dhe Albana Bytyqi nga AAK. Ndërsa, pesë deputetët e grupi parlamentar të LVV-së, Arjeta Fejza, Fatmire Kollçaku, Labinotë Demi, Drita Millaku, Nasuf Bejta, munguan në mbledhjen e këtij komisioni.