Bazuar në informatën e pranuar se një person ishte shfaqur në rrjetet sociale duke ekspozuar një armë, hetuesit policorë në Skenderaj kanë ndërmarrë veprime hetimore dhe si rezultat  është identifikuar dhe lokalizuar personi i dyshuar.

Sipas njoftimit, dje, mbi dyshimet e bazuara është  realizuar bastisje në  shtëpinë e të dyshuarit në zonën e Skenderajt.  Gjatë kontrollit janë gjetur dhe sekuestruar pesë armë: tri armë të shkurta (pistoleta), dy armë të gjata dhe 734 fishekë të kalibrave të ndryshëm.

Në njoftim thuhet po ashtu se ndaj tij është iniciuar rast penal për veprën: “Mbajtje në pronësi, kontroll ose posedim të paautorizuar të armëve.”