Presidenti i Ukrainës Volodymyr Zelensky dhe nënpresidenti i SHBA-së JD Vance kanë dhënë detaje nga diskutimet e tyre sot në margjina të konferencës së sigurisë  në Munih, duke thënë se patën një "bisedë të mirë" dhe se "ky nuk do të jetë takimi i parë, por as i fundit".

Zelensky tha pas takimit me DJ Vance se nevojiten bisedime të gjata për përgatitjen e një plani që do të ndalojë Putin dhe për t'i dhënë fund luftës.

Ai shtoi se Ukraina "do shumë paqe", por se kjo kërkon garanci reale të sigurisë, duke falënderuar SHBA-në për mbështetjen e saj.

Para takimit, Zelensky kishte shprehur gatishmërinë për bisedime me presidentin rus Vladimir Putin, por vetëm pasi të ishte arritur një plan paqeje me liderët amerikanë dhe evropianë.

Zelensky ishte ndër liderët e parë që foli në konferencën e Munihut, duke përcaktuar kushtet e tij pas presionit të SHBA për një zgjidhje të luftës.

"Unë do të takohem vetëm me një rus, me Putin, dhe vetëm pasi të biem dakord për një plan të përbashkët me (presidentin e SHBA) Trump dhe Evropën. Pastaj do të ulemi dhe do të ndalojmë luftën. Unë jam gati të takohem vetëm në atë rast," tha Zelensky më herët në një konferencë për shtyp.

I pyetur për marrëdhënien e tij me Trump, ai tha se presidenti republikan i dha atij numrin e tij privat të telefonit.

"Ishte qesharake... Ai më tha se mund ta telefonoja sa herë të doja. E falënderova dhe i kujtova që ma kishte thënë herën e fundit, por nuk ma dha numrin e tij. Ai u përgjigj: "Mirë, mund të më telefonosh sa herë të duash", komentoi Zelensky bisedën me Trump.

SHBA synon paqe të qëndrueshme në Ukrainë, e cila nuk do ta shtyjë Evropën Lindore në konflikt në vetëm pak vite, tha J. D. Vance pas takimit me Zelensky.

Vance tha se bisedimet e mëtejshme do të pasojnë "në ditët, javët dhe muajt në vijim".

I pyetur se si SHBA planifikon të ecë përpara nëse Ukraina nuk dëshiron të ulet në tryezë me Putin, Vance tha se një ekip i lartë është i përfshirë në negociata dhe se është "e rëndësishme që të mblidhemi së bashku" për të biseduar, duke shtuar se kjo është gjithçka që ai do të thotë për momentin.

Ndërsa në fjalimin e tij gjatë konferencës së Munihut, Vance nuk paraqiti, siç pritej, detajet e një plani paqeje për Ukrainën, por e përdori fjalimin për të kritikuar Evropën për shkeljen e lirisë së fjalës së qytetarëve të saj dhe shpërfilljen e vullnetit të votuesve.