Presidenti i Ukrainës Volodomyr Zelensky ka bërë të ditur se ka përgatitur planin për t’i dhënë fund luftës me Rusinë.
Ai në një intervistë të transmetuar në Rai 1 dhe të regjistruar në Cernobbio në margjinat e Forumit Teha, ka thënë se Kievi zyrtar “dëshiron garanci dhe se janë pranë fundit të luftës.”
Zelensky tha se për momentin nuk ka asgjë konkrete, por kontakti i parë do të jetë me presidentin amerikan Joe Biden.
“Këto nuk janë vetëm armë, por edhe çështje të rëndësishme globale. Ne po flasim për një paketë konkrete të mbrojtjes dhe nëse e kemi atë, do të jetë një pengesë e fortë për Rusinë dhe për t'i dhënë fund luftës në kushte diplomatike. Ne jemi më afër fundit të luftës sesa situata në të cilën ishim në fillim. Me këta hapa, me bindje, me konferenca rindërtimi dhe me marrëveshje konkrete forcojmë ekonominë dhe afrojmë fundin e luftës. Sot me Giorgia Meloni biseduam për përgatitjet e konferencës ndërkombëtare për rindërtimin e Ukrainës”, tha Zelensky. /ANSA
