Shoqata e Naftëtarëve të Kosovës ka shprehur shqetësim për çështjen e licencave pas skadimit të afatit më 23 dhjetor për pikat e karburanteve.

Në mbledhjen e kuvendit të kësaj shoqate, kryetari Fadil Berjani tha se zbatimi i ligjit të naftës, i cili është miratuar pas dhjetë vjet shtyrjeje në Kuvend, do të ishte i rëndësishëm pasi aty janë inkorporuar edhe kërkesat e naftëtarëve.

Tahir Zogaj nga Shoqata e Naftëtarëve të Kosovës shprehu shqetësimin për afatin e skadimit të licencave për pikat e karburantit më 23 dhjetor. Ai theksoi se sipas ligjit të legalizimit, të gjitha pikat pa leje ndërtimi ose pa leje përdorimi nuk mund të pajisen me licencë pas kësaj date. Ai ka kërkuar që afati për pajisjen me licencë të shtyhet deri në fund të vitit 2025.

Drejtori i Departamentit të Naftës në Ministrinë e Tregtisë, Bujar Mustafa tha se procesi i pajisjes me licenca nuk dëmton bizneset.

Përfaqësuesi i njërës nga pikat e derivateve, Izet Gashi, theksoi se Kosova “po vuan shumë prej licencave të tepruara.” Ai ka pyetur nëse mund të lehtësohet marrja e licencave për hapjen e karburanteve në veri.

Për këtë, Mustafa tha se kriteret për hapjen e pikave të karburantit në veri nuk dallojnë nga pjesa tjetër e vendit.

Ndryshe, Ligji për Naftën ka kaluar pas 10 vjet shtyrjeje në Kuvend gjë e cila sipas ministres Hajdari kishte shkaktuar informalitet në treg. Sipas saj, sektori i naftës tashmë ka një ligj që përcakton standardet dhe direktivën e BE-së, por obligon Qeverinë të nxjerrë udhëzimet për cilësinë e naftës dhe rritjet e parametrave në laboratorin e doganës.