Përtej barrierave: Të amputuarit synojnë kualifikimin në Kampionatin Evropian të Futbollit
Tema
Lexohet për: 2 min.
2 muaj më parë
Linku u kopjua
Në Turneun Ballkanik të Futbollit të Amputuarëve që u zhvillua në Shqipëri, Kosova zuri vendin e dytë, duke shënuar kështu një sukses të jashtëzakonshëm, edhe pse kjo ishte hera e parë që vendi ynë u përfaqësua në këtë garë.
Kryetari i Përfaqësueses së Kosovës në këtë kategori, Mirjon Samadraxha, thotë se rezultati i arritur në këtë kampionat ishte ai që e kishin pritur.
“Ne kemi qenë pjesëmarrës në Ligën Ballkanike që mbahet, këtë vit ishte sezoni i parë, kanë qenë pjesëmarrës Shqipëria, Turqia dhe Kosova. Kosova është renditur e dyta pas fitores kundër Shqipërisë me rezultat 2.0 me një paraqitje fantastike nga djemtë...Sinqerisht ishte rezultati që e prisnim dhe e dëshiruam për këtë kampionat”, thotë Samadraxha.
Samadraxha ka bërë të ditur se ky ekip ka në përbërje 15 lojtarë të cilët e zhvillojnë këtë aktivitet krejtësisht në baza vullnetare.
Ai shton se ky grup i lojtarëve janë jashtëzakonisht të motivuar dhe se momentet më të mira i përjetojnë gjatë stërvitjeve të përbashkëta.
Kërkesa e Samadraxhës është që të ketë më shumë mbështetje financiare për këtë kategori.
“Ne kemi nevojë për mbështetje financiare duke marrë parasysh se kemi lojtarë nga të gjitha trevat e Kosovës, Hani i Elezit, Gjakova, Prizreni, Suhareka. Pra, është problem, çdo vikend të udhëtohet për të ardhur në stërvitje sepse stërvitjet i mbajmë në Prishtinë dhe është goxha e mundimshme për të gjithë ata”, thotë Samadraxha.
E synimi madhor është kualifikimi në Kampionatin Evropian të të Amputuarve.
“Është e ngjashme me futbollin normal, pra janë Evropiani, Botërori, kualifikimet për në Evropian. Vitin e ardhshëm i kemi kualifikimet për Evropian, jemi në grup me Skocinë, Rumaninë dhe Shqipërinë që është një grup i favorshëm për ne që të shpresojmë në kualifikim”, përfundon Sermaxhaj.
