Përfundon takimi në mes Vuçiq dhe përfaqësuesve të serbëve në Kosova
Ka përfunduar takimi në mes presidentit të Serbisë, Aleksandër Vuçiq dhe përfaqësuesve të serbëve në Kosova, ku është diskutuar për negociatat e zhvilluara në Bruksel.
Në takimin që u mbajt në Beograd, morën pjesë edhe kryeministrja Ana Brnabiq, ministri i Financave, Sinisha Mali, drejtori i Zyrës së ashtuquajtur për Kosovë, Petar Petkoviq, kryetari i Listës Serbe, Goran Rakiq, nënkryetarët e LS, Igor Simiq, Dalibor Jevtiq, Milan Radoiçiq dhe kryetarë komunash nga veriu i Kosovës.
Presidenti Vuçiq është paraparë t'i drejtohet publikut rreth orës 13:30, që do të jetë fjalimi i tij i parë pas raundit të fundit të dialogut Beograd-Prishtinë në nivelin më të lartë, i cili është mbajtur të enjten në Bruksel, por që nuk solli rezultat.
Vuçiq tha të enjten nga Brukseli se ishte një ditë e vështirë për Serbinë dhe se ai do të vazhdojë të luftojë për paqe dhe stabilitet.
Drejtori i Zyrës së ashtuquajtur për Kosovë, Petar Petkoviq, duke paralajmëruar fjalimin e presidentit, tha se do të jetë “një nga fjalimet e tij më të rëndësishme”, në të cilën do të flasë për sjelljen e Kurtit në Bruksel, si dhe për situatën aktuale, dialogun dhe propozimet.
