Kombëtarja e Shqipërisë në futboll ka pësuar humbjen e parë në edicionin e ri të Ligës së Kombeve.

Ndeshja në “Air Albania” në Tiranë ka përfunduar sonte me fitoren e Gjeorgjisë me rezultatin 1:0.

Golin e vetëm dhe të fitores për mysafirët e shënoi Giorgi Kochorashvili në minutën e 71-të.

Shqipëria kërkoi në vazhdim barazimin, por mbrojtja kundërshtare u tregua e vëmendshme përballë sulmit kuqezinj.

Mysafirët kanë mundur të shënojnë edhe golin e dytë tre minuta para përfundimit të ndeshjes, por portieri Thomas Strakosha priti për mrekulli goditjen e rrezikshme të Zuriko Davitashvili.

Në ndeshjen tjetër të grupit, Republika Çeke arkëtoi tri pikët e para si vendës duke mposhtur me mjaft vështirësi Ukrainën me rezultatin 3:2.

Gjeorgjia prin në tabelë e 6 pikë, kuqezinjtë mbeten në pozitën e dytë me tri pikë, po aq sa ka edhe Republika Çeke e treta dhe Ukraina e fundit pa asnjë pikë.

• 

•