Xhamia e vjetër në Mamushë është përfshirë nga një zjarr, i cili dyshohet të ketë ndodhur si pasojë e energjisë elektrike.

Zëdhënësi i Policisë së Kosovës për rajonin e Prizrenit, Shaqir Bytyqi, ka bërë të ditur për KosovaPress se rasti ka ndodhur të enjten.

“Më datën 7 mars 2024 rreth orës 14:00 në Stacionin Policor Mamushë kemi marrë informatë për një incident zjarri në xhaminë e vjetër në Mamushë. Në vendngjarje ka dalë patrulla dhe hetimet e stacionit, gjithashtu ekipi i forenzikës nga Suhareka dhe inspektorët komunalë të zjarreve nga ekspertët e zjarreve nga ekipi i zjarrfikësve. Zjarri është lokalizuar, për momentin shkaqet nuk dihen, por dyshohet si pasojë e rrymës elektrike”, ka thënë ai.

Si pasojë e zjarrit janë shkaktuar vetëm dëme materiale, ndërkohë që rasti ndodhet nën hetime.