Përçarje apo çështje teknike? Pozita dhe opozita komentojnë deklaratat e Osmanit
Lexohet për: 2 min.
7 muaj më parë
Linku u kopjua
Deklarata e presidentes, Vjosa Osmani për mungesën e koordinimit në çështjet e anëtarësimit në organizatën evropiane, ka nxitur reagime nga pozita dhe opozita. Derisa partia në pushtet mohon çdo përçarje me presidenten, opozita këmbëngul se mungesa e koordinimit mes institucioneve po dëmton politiken e jashtme.
Derisa Osmani ka theksuar se nuk është informuar në lidhje me letrën dërguar në KiE, nga mazhoranca deklarojnë se kjo kishte të bëjë më shumë me çështje teknike, mirëpo duke shtuar se raporti i tyre me presidenten është i shkëlqyer.
Deputeti nga Lëvizja Vetëvendosje, Armend Muja ka theksuar për KosovaPress se marrëdhëniet me presidenten janë të mira, dhe se është detyre e tyre të respektojnë misionin e saj.
Për dallim nga pushteti, deputetet opozitar thonë se ka munguar vazhdimisht bashkëpunimi i Qeverisë Kurti me presidenten. Deputetja nga Lidhja Demokratike e Kosovës, Valentina Bunjaku-Rexhepi derisa ka thënë se ka mungesë koordinimi, ka shtuar se presidentja Osmani duhet të luajë më fuqishëm rolin e saj kushtetues, në mënyrë që mos të bije në grackë të Kurtit.
Se ka përçarje mes qeverisë dhe presidentes e thotë edhe deputeti i Aleancës për Ardhmërinë e Kosovës Pal Lekaj. Sipas tij, ky mos koordinim i tyre po i shkakton dëme Kosovës.
Në anën tjetër, Konjufca më herët ka deklaruar se kjo ka të bëjë më shumë me çështje teknike dhe jo si diçka të qëllimshme.
Kosova nuk u përfshi në agjendën e KiE më 16-17 maj. Kancelari gjerman Olaf Scholz, kryeministrja italiane Giorgia Meloni dhe presidenti francez Emmanuel Macron thanë në një letër se “ekziston një rrezik real që pa progres vendimtar të asociacionit, aplikimi në KiE s’do të merr mbështetjen e duhur”.
