Përbindëshi me 'fytyrë gjarpri' u zbulua në Wyoming
Miliona vjet më parë, një zvarranik detar gjigant, me qafë të gjatë valëvitej nëpër ujërat e një rrugë detare të lashtë në atë që tani është Wyoming në SHBA, duke përdorur nofullat e tij si krokodili për të kapur krijesat detare.
Paleontologët zbuluan fosilet e përbindëshit në vitin 1995 gjatë një gërmimi në Pierre Shale, një formacion gjeologjik që daton në periudhën e Kretakut të Sipërm (rreth 101 milionë deri në 66 milionë vjet më parë).
Ndryshe nga pleziozaurët e tjerë, kjo kafshë kishte karakteristika fizike që e dallonin atë nga anëtarët e tjerë të kësaj klase të zhdukur zvarranikësh detarë.
Tani, studiuesit kanë zbuluar gjetjet e tyre rreth kësaj specie të re në një studim të botuar më 26 shtator në revistën iScience.
"Pleziozaurët zakonisht kanë një qafë të gjatë, gjarpërore me një kokë të vogël, ose një qafë të shkurtër dhe një nofull të gjatë si krokodili," tha Walter Scott Persons, një paleontolog nga Kolegji i Charleston në Karolinën e Jugut dhe autori kryesor i studimit.
"Në këtë rast, kjo bishë e çuditshme, unike është një kryqëzim midis të dyjave," shtoi ai për Live Science.
Paleontologët e quajtën kafshën Serpentisuchops pfisterae, që përkthehet në "fytyrë gjarpri".
Mbetjet e krijesës 7 metra të gjatë janë ekspozuar në Muzeun Paleontologjik Glenrock pranë Casper, Wyoming, që kur fosilet u zbuluan më shumë se 25 vjet më parë.
