Ministri i Bujqësisë, Pylltarisë dhe Zhvillimit Rural, Faton Peci u takua sot me homologun e tij nga Letonia, Armands Krauze me të cilin diskutuan rreth bashkëpunimit në sektorin e bujqësisë dhe thellimin e bashkëpunimit të deritanishëm në sektorin e pylltarisë.

Gjatë këtij takimi, ministri Peci theksoi se me Letoninë ndajmë vlera të përbashkëta për sa i përket bujqësisë dhe zhvillimit të qëndrueshëm të këtij sektori.

“Me ministrin Krauze u dakorduam që shumë shpejt ta zyrtarizojmë bashkëpunimin mes vendeve tona përmes një marrëveshjeje të mirëkuptimit në mënyrë që përmes projekteve të përbashkëta, të kemi qasje në fondet mbështetëse evropiane e ndërkombëtare”, tha ministri Peci, i cili njëkohësisht ftoi Krauze për vizitë në Kosovë, në mënyrë që të ketë një pasqyrim më të mirë të potencialit agro-ekonomik të vendit tonë.

Tutje, ministri Peci shtoi se Kosova dhe vendet e Baltikut ndajnë edhe rrezikun e përbashkët të fqinjëve agresorë përpos vlerave të përbashkëta njerëzore, andaj edhe nevoja për bashkëpunim ndërshtetëror është më e shprehur dhe duhet të intensifikohet, thuhet në komunikatë.