Pasiguria në Ballkan ka dy burime kryesore, Konjufca takon emisarin slloven Frangesh
Kryeparlamentari Glauk Konjufca priti sot në takim të dërguarin e Sllovenisë për Ballkanin Perëndimor Anzhej Frangesh, me të cilin diskutoi mbi zhvillimet në Kosovë dhe në rajon, veçanërisht në kontekst të sigurisë dhe nevojës për stabilitet.
Kryekuvendari Konjufca shprehu vlerësimin e tij se sot pasiguria në rajon ka dy burime kryesore, agresionin rus në Ukrainë dhe mospajtueshmërinë e Serbisë me kufijtë e saj, përkatësisht ambicien për zgjerim territorial.
U diskutua po ashtu për dialogun Kosovë-Serbi, përkatësisht nevojën që BE-ja të bëjë më shumë që Serbia t'i rikthehet Marrëveshjes së Brukselit si korniza bazë për normalizimin e raporteve mes dy shteteve.
Frangesh shprehu qëndrimin e tij se Sllovenia, por edhe BE-ja duhet të njohin më shumë perspektivën se si palët, përkatësisht ajo e Kosovës, i shohin gjërat në mënyrë që kjo të reflektojë në qasjen më adekuate të faktorit ndërkombëtar kundrejt zhvillimeve në raportet Kosovë-Serbi, por edhe zhvillimeve politike në përgjithësi në rajon.
