Osmani: Sllovenia aleate e palëkundur e Kosovës euroatlantike
Lajme
Lexohet për: 2 min.
2 ditë më parë
Linku u kopjua
Presidentja e Kosovës, Vjosa Osmani ka pritur në takim kryetaren e Kuvendit Kombëtar të Sllovenisë, Urshka Klakoçar Zupançiç, me të cilën ka biseduar mbi raportet ndërmjet të dy vendeve dhe avancimin e tyre të mëtejshëm.
Gjatë takimit, presidentja Osmani shprehu vlerësimin e thellë për mbështetjen e palëkundur në rrugën për liri, pavarësi dhe shtet-ndërtim, duke thënë se Sllovenia është mike dhe aleate e fuqishme e Kosovës.
"Sllovenia dhe Kosova kanë një lidhje të fortë dhe ne jemi të përkushtuar të punojmë së bashku për t’i adresuar sfidat e përbashkëta dhe për të shfrytëzuar mundësitë e shumta për bashkëpunim. Përmes bashkëpunimit, ne mund t`i arrijmë qëllimet tona të përbashkëta dhe të kontribuojmë në ruajtjen e stabilitetit dhe prosperitetit në rajonin tonë dhe përtej”, ka theksuar Osmani.
Ajo shtoi se Kosova është shembull pozitiv në rajon me progresin në fushën e sundimit të ligjit, luftën ndaj korrupsionit dhe krimit të organizuar, transparencën, qeverisjen e mirë dhe respektimin e të drejtave të njeriut.
Osmani theksoi se Kosova në politikën e saj të jashtme synon forcimin e pozitës së saj ndërkombëtare dhe anëtarësimin në organizatat ndërkombëtare, me ç’rast potencoi edhe rolin e rëndësishëm të diplomacisë parlamentare, duke shtuar nevojën e vazhdimit të mbështetjes sllovene për anëtarësim në BE e NATO.
Në takim u diskutua edhe mbi rëndësinë e bashkëpunimit ndërparlamentar të grupeve të miqësisë, shkëmbimit reciprok të përvojave, si dhe thellimin e bashkëpunimit në ekonomi, teknologji informative etj.