Kuadratet e Forcës së Sigurisë së Kosovës janë rreshtuar të martën në kazermën “Adem Jashari”, për nder të 26-vjetorit të Epopesë së lavdishme të Ushtrisë Çlirimtare të Kosovës. Krerët e shtetit, pasi bën homazhe pranë obeliskut të Ushtrisë Çlirimtare të Kosovës, thanë se Epopeja e Prekazit ka sjellë ndryshimin e kursit për liri dhe pavarësi.

Presidentja e Kosovës, Vjosa Osmani, para ushtarëve të FSK-së, tha se mungesa e drejtësisë dhe mosndëshkimi i kriminelëve serb të luftës ka trimëruar trashëgimtarët e tyre, siç është rasti me agresionin e Serbisë kundër Kosovës më 24 shtator të vitit të kaluar.

Megjithatë, ajo nënvizoi se Kosova është një realitet i pakthyeshëm, shtet sovran dhe me integritet territorial të qartë. Ajo shtoi se Kosova do të mbrojë lirinë dhe paqen me çdo kusht.

Ndërkaq, kryeministri Albin Kurti, tha se ledhatimi i padrejtësisë nuk do të sjellë asnjëherë paqen, duke theksuar se popullin e mban ideali i kulluar i Epopesë së Jasharajve.

Në anën tjetër, Lulzim Jashari, djali i komandantit Adem Jashari, tha se në këtë ditë të shënuar është nder të flasësh para uniformës së ushtarëve tanë.

Ai theksoi se arma e shqiptarit është arma më e pastër në Ballkan, që ka shkrepur vetëm në emër të mbrojtjes së shtetit, të kombit dhe në emër të lirisë.

Lajmi i plotë në sistemin me parapagim...