Presidentja e Kosovës, Vjosa Osmani ka thënë se anëtarësimi në NATO mbetet objektivi strategjik i shtetit e që kjo tani është më i domosdoshëm se kurrë dhe parakusht për paqe në rajon. Kështu u shpreh ajo gjatë fjalimit që pati në ceremoninë shtetërore të shënimit të 24-vjetorit të Epopesë së lavdishme të Ushtrisë Çlirimtare të Kosovës (UÇK).
Me këtë rast Osmani tha se marsi i vitit 1998 shënon kthesën e madhe në historinë shekullore të popullit të lirisë, ku për tre ditë të epopesë familja Jashari bashkë me bashkëluftëtarët dhe bashkëfshatarët u heroizuan e si heronj të kombit do të mbetën për sa të jetë Kosova.“Me 5,6, 7 mars të vitit 1998 rezistenca e familjes Jashari ishte thirrje për mobilizim të të gjithë popullit për t’i dhënë fund robërisë, për ta kthyer dinjitetin në vend dhe për ta dërguar mesazhin se liria nuk ka çmim. Duke refuzuar nënshtrimin komandanti legjendar Adem Jashari bashkë me familjarët e tjerë dhe bashkëfshatarë ranë heroikisht në mbrojtje të atdheut. Ky sakrifikim i familjes Jashari me bashkëfshatarë e bashkëluftëtarë u bë guri themeltar i lirisë së shtetit tonë. Kjo familje është portreti i lirisë sonë e cila ishte e zorshme për tu arritur, për të cilën u deshtë shumë mund, për të cilën ranë edhe 3 mijë dëshmorë të UÇK 13 mijë civilë u dhunuan afër 20 mijë gra e burra dhe të zhdukur me dhunë janë ende mbi 1 mijë e 600 persona, por ende nuk ka drejtësi për asnjërin nga ta. Prandaj duhet edhe të vendoset drejtësia edhe për të pasur kuptim liria jonë, edhe për të nxjerrë mësime nga historia. Ne nuk po kërkojmë asgjë më shumë se drejtësi”, tha Osmani.
E kërcënimet ndaj lirisë Osmani thotë se tashmë janë realitet i cili po përjetohet akoma e që hegjemonia po shihet në kontinentin tonë. Ajo teksa foli për domosdoshmërinë e anëtarësimit të Kosovës na NATO u shpreh edhe se sot si asnjëherë më parë duhet të rritet përkushtimi për ushtrinë e Kosovës.
