O’Brien: Moszbatimi i marrëveshjeve mundësi e humbur për Kosovën e Serbinë
Ndihmës sekretari amerikan i Shtetit Jim O’Brien ka folur mbi procesin e dialogut Kosovë-Serbi, pas dështimit të organizimit të një takimi trepalësh në Bruksel.
Ai në një postim në X ka shkruar se takimi i djeshëm nënvizoi faktin se palët duhet të ripërkushtohen për të trajtuar problemet dhe për të ndjekur mundësitë në kuadër të dialogut të lehtësuar nga BE-ja.
“Moszbatimi i marrëveshjeve të kaluara është me të vërtetë një mundësi e humbur për të dyja palët”, ka shkruar O’Brien.
Ai ka shpërndarë deklaratën e shefit të diplomacisë evropiane Josep Borrell.
“Së pari, zyrtarizimin e marrëveshjes themelore përmes nënshkrimit nga udhëheqësit e shteteve dhe qeverive përkatëse. Së dyti, tërheqjen e letrës së paraqitur zyrtarisht në BE nga ish-kryeministrja (serbe Ana) Bërnabiq, e datës 13 dhjetor 2023. Dhe së treti, dorëzimin e Milan Radojçiq dhe grupit të tij paraushtarak-terrorist tek autoritetet gjyqësore të Kosovës”, citoi Borrell kushtet e Kurtit i cili nga ana e tij tha se bëhet fjalë për “garanci për mirëbesim dhe vullnet të mirë të cilat mundësojnë zbatimin e marrëveshjeve”.
Duke paralajmëruar vazhdimin e bisedimeve në nivel kryenegociatorësh javën e ardhshme, Borrell tha se BE do të vazhdojë përpjekjet për normalizimin e marrëdhënieve Kosovë-Serbi.
Ndryshe, takimi i fundit ndërmjet kryeministrit Albin Kurti dhe presidentit Aleksandar Vuçiq është mbajtur në shtator 2023, pak ditë para sulmit terrorist në Banjska.
