Presidenti i Federatës së Futbollit të Kosovës, Agim Ademi, po merr pjesë në Kongresin e 48 të Unionit Evropian të Futbollit (UEFA) në Paris dhe në 70 vjetorin e themelimit të saj, e ku ka zhvilluar takime me presidentin e UEFA-s, Aleksandër Çeferin dhe presidentin e FIFA-s, Gianni Infantino.

Takimi me presidentin e UEFA-s, Çeferin, ka qenë i karakterit informues, ku presidenti Ademi e ka informuar rreth zhvillimeve në FFK dhe projektet që janë në proces të zhvillimit dhe ato që pritet të realizohen. Një pjesë e rëndësishme e diskutimeve është përqendruar për stadiumin “Fadil Vokrri”, ku do të bëhet ndërrimi i fushës në hibrid, në kuadër të Memorandumit të Bashkëpunimit me Ministrinë e Kulturës, Rinisë dhe Sportit. Pritet që marrëveshja mes dy institucioneve të nënshkruhet së shpejti dhe të fillojnë punimet në këtë projekt, me synim që stadiumi të jetë i gatshëm për ndeshjet zyrtare të Kombëtares së Kosovës.

Në punimet e Kongresit të UEFA-s u miratuan ndryshimet në statutin e UEFA-s, raporti financiar, si dhe u caktuan anëtarët e Shoqatës së Klubeve Evropiane dhe Shoqatës së Ligave Evropiane, të cilët do të shërbejnë në Bordin e Drejtorëve të UEFA-s.