Kryeministri izraelit Benjamin Netanyahu ka thënë se fitorja totale në Gaza është e arritshme dhe ka refuzuar ofertën e fundit të Hamasit për armëpushim për të siguruar kthimin e pengjeve ende në enklavën e rrethuar.

Ai tha se negociatat me grupin “nuk po shkojnë askund” dhe i cilësoi kushtet e tyre si “të çuditshme”.

"Nuk ka zgjidhje tjetër përveç një fitoreje të plotë dhe përfundimtare. Nëse Hamasi mbijeton në Gaza, është vetëm një çështje se sa do të zgjasë deri në masakrën e ardhshme," tha Netanyahu në një konferencë për shtyp.

Ai përsëri u zotua të shkatërrojë organizatën palestineze, duke thënë se nuk kishte asnjë alternativë tjetër për Izraelin përveç shkatërrimit të Hamasit.

Hamasi propozoi një armëpushim në Gaza që zgjat katër muaj e gjysmë, gjatë të cilit do të liroheshin të gjithë pengjet, Izraeli do të tërhiqte ushtarët e tij nga Rripi i Gazës dhe do të arrihej një marrëveshje për t'i dhënë fund luftës.

Oferta e Hamasit është një përgjigje ndaj një propozimi të mëparshëm nga shefat e inteligjencës amerikane dhe izraelite, i cili iu dorëzua Hamasit nga ndërmjetësit e Katarit dhe Egjiptit javën e kaluar.

Sekretari amerikan i Shtetit Antony Blinken diskutoi ofertën me Netanyahun, i cili mbërriti në Izrael pas bisedimeve me liderët e Katarit dhe Egjiptit, të cilët vepruan si ndërmjetës.

Blinken më vonë u takua me presidentin palestinez Mahmoud Abbas në qytetin Ramallah të Bregut Perëndimor.

Izraeli nisi ofensivën e tij ushtarake pasi militantët nga Gaza, të drejtuar nga Hamasi, pushtuan Izraelin jugor më 7 tetor, duke vrarë 1200 njerëz dhe duke marrë peng 253.

Ministria e Shëndetësisë në Gaza pretendon se të paktën 27.585 palestinezë janë vrarë, dhe mijëra të tjerë janë varrosur nën rrënoja dhe gjithashtu supozohet se kanë vdekur. Deri më tani ka pasur vetëm një armëpushim, i cili zgjati vetëm një javë në fund të nëntorit.

Izraeli ka thënë më parë se nuk do të tërheqë trupat e tij nga Gaza ose nuk do të përfundojë luftën derisa Hamasi të shkatërrohet. Megjithatë, burimet thanë se Hamasi ka ndryshuar kërkesën e tij të kahershme për përfundimin e luftës dhe tani po propozon që çështja të zgjidhet përmes negociatave në të ardhmen në vend që të jetë kusht për një marrëveshje armëpushimi.

Një burim i njohur me negociatat tha se në ofertën e re, Hamasi nuk kërkoi garanci për një armëpushim të përhershëm, por kërkoi që të binte dakord për përfundimin e luftës përpara lirimit të të gjithë pengjeve.